ATLAS BASICO DE VIGO E A SUA AREA

Un dos elementos que mellor permiten identificar a unha persoa co seu pasado e co seu porvir é o espacio vivido. Este concepto significa algo máis que un territorio administrativo, pois representa as paisaxes mentais, as escenas de vida que pasan polo cerne das persoas. Son símbolos e prexuízos que condicionan, en gran medida, as súas relacións con outras persoas, cos seus sentimentos e comportamentos. Malia que algúns queiran obxectivizar estas crenzas nun ideal patriótico, único para tódolos que viven (ou nacen) nun mesmo territorio, nós entendemos que cada persoa pode interpretar individualmente o seu medio xeográfico, incluíndo os seus sentimentos, desbotando prexuízos e analizando os intereses económicos e sociais que mediatizan a súa percepción do espacio. Para poder interpretar, explicar e comprende-las paisaxes de cada un é necesario coñece-los datos fundamentais da xeografía compartida por diversas persoas nun mesmo territorio. E un dos xeitos máis precisos e sintéticos para descubrir un medio é a súa interpretación cartográfica. Un mapa non é a realidade social e territorial, sobre todo cando neste contexto aparecen sentimentos, actividades económicas, patrimonio cultural. Pero os mapas constitúen un dos mellores xeitos de representar unha realidade que se localiza e se espalla por todo un territorio. Un atlas é como sabemos un conxunto de mapas. Xeralmente representan fenómenos estatais e internacionais. O que agora presentamos é un conxunto de mapas de diferente escala de Vigo e a súa área de influencia. ¿Por que? En primeiro lugar porque Vigo, como outras cidades do Eixo Atlántico e de Europa occidental, ten unha gran importancia na organización dun territorio rexional no albor do terceiro milenio. Por iso interesa coñece-los recursos físicos e humanos, así como as relacións da cidade e a súa área de influencia con outras áreas. Dentro da área urbana de Vigo interesa analizar cómo se efectúa a dinámica demográfica, económica e os recursos ambientais e culturais, pois son os alicerces desta nova organización rexional. Ademais unha cidade establece contactos con outras cidades, por iso a análise das infraestructuras e medios de transporte deben servir para establece-las deficiencias e vantaxes da localización relativa de Vigo respecto doutras vilas