LITERATURA E SOCIEDADE EN GALICIA (1975-1990)

Os tres grandes desafíos da Galicia posfranquista foron outros tantos actos de reapropiación colectiva que tiveron como obxetivos prioritarios a memoria histórica, o dereito á palabra e a institucionalización da producción cultural.Os dous primeiros eran fundamentalmente actos reivindicativos que se apoiaban nas novas condicións de comportamento democrático para recuperar espacios básicos de liberdade; o terceiro representaba unha experiencia nova, única e descoñecida no ámbito da sociedade galega.A producción e, quizais máis importante aínda, a reproducción simbólica á penas entraran nos circuítos comerciais cando Galicia accede ao réxime de liberdades políticas despois de 1975. Os feitos culturais semellaban ata entón pezas de museo, obxectos reverenciados pero por iso mesmo paralizados. Toda a década dos 80 foi un ininterrompido esforzo para superar esta situación e por iniciar un diálogo aberto entre a producción cultural, as esixencias da modernidade e a renovada imaxe da identidade social. Os múltiples logros, algúns deles significativos, non poden silenciar, sen embargo, as deficiencias que aínda persisten e seguen desafiando a institucionalización social da producción cultural galega.