NAIA ESKULTORE ITSUA / EL ESCULTOR CIEGO (BIBLIOTECA VASCA BILING ÜE)

AURKEZPENA Naia detektibearen abenturak Naia detektibe gaztea ez zen liburu honetara munduratu, Naia. Eskultore itsua hau, berez, protagonista bera daukan istorio sorta baten hirugarren liburuxka baita. Aurretiaz, Elkar argitaletxearen eskutik Naia Chinatown inguruan eta Naia India gorrietan audio-liburuak argitaratuak izan dira, denak euskara hutsez. Hiruretan, esan bezala, Naia Otalora detektibe bilbotarra dugu protagonista nagusia, eta berarekin batera, detektibe istorioek eskatu ohi duten moduan, laguntzaile bat, Margot. Biak emakumezkoak, biak gaurko gizarteak pairatzen duen krisiaren zurrunbiloak harrapatuak, biak hiri ezagun baten paisaiaren partaideak. Naia Bilbo Zaharreko San Franzisko kalean bizi da, oraingo bohemioak eta betiko baztertuak eskutik elkar hartuta doazen auzo latz horretan. Bertan, alokatutako pisu zahar batean Margot, Alfonso eta Jonerekin batera bizi da. Naia detektibea da ogibidez, baina ez bokazioz, lan ezak horrexetara behartu duelako baino. Naia beharrizan jakin batetik sortu zen; hau da, nire euskara ikasleei irakurgai mailakatuak eta interesgarriak eskaintzeko beharrizanetik. Izan dira, eta badira, liburu mota hau argiratatu izan duten hainbat argitaletxeren bilduma batzuk (Irakurmendi, Arian, Hegan, Xirimiri, Noski, Atoan…) Hala ere, oraindik oso bakanak dira, batez ere oinarrizko mailetarako jatorriz euskaraz idatzitako liburuak.