ES KLOPFT

Franz Hohler, naceu en 1943 en Biel (Suíza), pero pasou a súa infancia en Olten. Na actualidade vive en Zürich onde traballa como artista de cabaré e escritor. No ano 1965, tras estudar dous anos e medio Filoloxía Alemá e Románica, fixo o seu primeiro espectáculo en solitario, unha combinación de literatura e música. Dende entón segue actuando con frecuencia en Alemaña e Suíza, ofrecendo espectáculos unipersoais. Ademais, escribe programas para a radio e a televisión, é autor de obras de teatro e guións televisivos e ten publicadas varias novelas, como Der neue Berg e Die Steinflut. No entanto, é coñecido sobre todo polas súas historias breves para adultos e nenos. Trátase de contos curiosos e enigmáticos, a miúdo mesmo grotescos, pero que sempre convidan á reflexión. Moitos dos seus contos infantís están recompilados en Der Riese und die Erdbeerkonfitüre, con ilustracións de Nikolaus Heidelbach. Cando cumpriu sesenta anos, Franz Hohler percorreu a pé o seu país natal; desa viaxe xurdiu 52 Wanderungen. Unha das súas obras destacadas, e sen dúbida a inspiradora do presente volume Así comezou todo ” (Xerais 2007), foi o traballo que Franz Hohler e Jürg Schubiger publicaron conxuntamente en 1986: Hin-und Hergeschichten.